Julia Griffith

Ganed Julia ym Mangor yn 1954 a’i magu yn Aberaeron, Ceredigion. Derbyniodd ei haddysg yn Ysgol Gelf Caerwynt a’r Coleg Celf Brenhinol. Enillodd Ysgoloriaeth y Cyngor Prydeinig i ymchwilio i ddiwylliant Slofacaidd, a dyna ddechrau ar ei chysylltiad celfyddydol rhwng Cymru ag Ewrop. Cafodd ei gwaith ei arddangos mewn orielau o bwys ym Mhrydain ac Ewrop ac yn 2017 enillodd y Fedal Aur yn yr Eisteddfod Genedlaethol am ei gosodiad weiar ‘Ystafell o fewn Ystafell’. Ymhlith ei chomisiynau diweddar mae darnau i Amgueddfa Caerfyrddin, y Ganolfan Gwydr Genedlaethol a Thŷ Newton, Dinefwr.