Rebecca Williams

Mae’r serameg a wnaed â llaw gan Rebecca Williams yn crisialu ffurf, lliwiau, planhigion ac anifeiliaid gwlad ei mebyd, Sir Benfro, ar gyrion gorllewinol Cymru. Mae hi’n cyfuno ei phrofiad fel cerflunydd a thechnegydd archaeolegol a’i harsylwadau craff o’r amgylchedd naturiol ac adeiledig i greu gwaith ag uniondeb artistig ac ymarferol. Mae Rebecca yn siarad Cymraeg fel iaith gyntaf, ac mae ganddi hanes teuluol hynod ddiddorol wedi’i blethu o fywydau ffermwyr a morwyr, gwneuthurwyr les, cyfreithwyr a phenseiri. Astudiodd yn Central St Martins a bu’n byw yn yr Almaen am flynyddoedd lawer. Mae ei Halmaeneg rugl a’i gwybodaeth am gelf a dylunio wedi arwain at lawer o gomisiynau i gyfieithu testunau a chatalogau ar gyfer amgueddfeydd, gan gynnwys y Bauhaus Museum Dessau a’r Kunsthistorisches Museum yn Fienna. Odyn Ddu yw enw un o gaeau ei thad ger Tremarchog. Dyma safle odyn hynafol a oedd yn cynhyrchu potiau wedi’u gwneud o’r clai tywyll ychydig o dan wyneb y tir.